Trending
Friday, January 17, 2025
रामेछापको मन्थलीबाट सोलुखुम्बुको लुक्लामा पुनः उडान सुरु गरिएको छ । प्रतिकूल मौसमका कारण पाँच दिनसम्म निरन्तर मन्थली–लुक्ला उडान ठप्प भएको थियो ।
बिहीबार बिहानदेखि उडान सुरु गरिएको हो । योसँगै रामेछापमा अलपत्र परेका पर्यटक लुक्ला हुँदै आफ्नो गन्तव्यतर्फ प्रस्थान गरेका छन् । उडान सुरु भएसँगै पर्यटक खुसी भएका जनाइएको छ । पर्यटकीय चापका बेला सामान्य अवस्थामा लुक्ला विमानस्थलमा दैनिक ४० भन्दा बढी उडान-अवतरण हुने गरेको छ ।
आज यती एयरलाइन्सले लुक्ला विमानस्थलमा १५ उडान-अवतरण गर्ने तालिका रहेको प्रवक्ता सुदर्शन बर्तौलाले जानकारी दिए । ‘पाँच दिनदेखि मौसममा सुधार नहुँदा उडान ठप्प भएको थियो । पर्यटकहरू फाप्लुको उडानमार्फत हिँडेरै लुक्ला हुँदै सगरमाथा क्षेत्रमा लागेका थिए ।
केही हेलिकोप्टरमार्फत उडान गरी गन्तव्यतर्फ लागेका थिए । आज मौसम खुलेसँगै उडान सहज भएको छ’, यती एयरका प्रवक्ता बर्ताैलाले भने, ‘हाम्रो जहाज तथा जनशक्ति सबै मन्थली विमानस्थलमै थिए, आज बिहानैदेखि उडानहरू सुचारु भइइरहेका छन् ।’
