मुस्लिम आयोगका अध्यक्ष समिम मिया अन्सारीले धार्मिक सहिष्णुता र आपसी भाईचाराको सम्बन्धबाट मात्र शान्ति कायम गर्न सकीने बताउनुभएको छ । आज काठमाडौमा मुस्लिम आयोग र साउदी राजदूतावासले इस्लाममा सहिष्णुता, सहअस्तीत्व र सामाजिक शान्ति प्रर्वद्धनमा भूमिका कार्यक्रममा उहाँले जुन सुकै जात,धर्म मान्ने भए पनि शान्ति एकता र सदभाव कायम गर्नु पर्ने बताउनुभयो । उहाँले बिश्व व्यापी रुपमा शान्तिको लागि बिभिन्न मुलुकबाट शान्तिकोलागि आवाज उठी रहेको भन्दै सबै धर्मवालम्बिको मुख्य उद्धेश्य शान्ति भएको पनि बताउनुभयो ।
राष्ट्रियसभाका अध्यक्ष गणेशप्रसाद तिमल्सिनाले अतिबादी सोच मानव जीवनकोलागि कंलक भएको बताउनुभयो । उहाँले अतिवादी सोचबाट आफू पनि बच्नु पर्ने र अरुलाई पनि बचाउनु पर्ने खाँचो औल्याउनुभयो । उहाँले बाहिरी मुलुकबाट नेपाल आउने व्यक्तिहरुले धार्मिक सहिष्णुता र सद्भावको सन्देश लिएर फीर्ने पनि बताउनुभयो ।

उहाँले राज्यले धार्मिक आस्थाअनुसार शिक्षा पाउने व्यवस्थाको ग्यारेन्टी राज्यले गर्नु पर्ने पनि बताउनुभयो । उहाँले मुस्लिमका लागि मदरसा शिक्षा, बुद्धिष्टका लागि गुम्बाको शिक्षा, हिन्दुका लागि संस्कृत शिक्षा पाउने लगायत सबै धर्म र समुदायका मानिसले आफ्नो धार्मिक आस्थाको आधारमा शिक्षा पाउने गरी छलफल अघि बढाउनुपर्ने आवश्यकता पनि औंल्याउनुभयो । त्यस अवसरमा अध्यक्ष तिमिल्सिनाले संवैधानिक आयोगहरुलाई आफ्नो औचित्य पुष्टि हुनेगरी काम गर्न पनि सचेत गराउनुभएको थियो ।
दुई दिने गोष्ठीमा साउदी अरब सरकारका सचिव, प्रतिनिधिहरु पनि सहभागी भएका छन् । नेपालका मुस्लिम समुदायलाई प्रतिनिधित्व गर्ने सांसद, पूर्वमन्त्री, विभिन्न संघ, संगठन पनि गोष्ठीमा सहभागी रहेको मुस्लिम आयोगले जनाएको छ ।