विश्व कीर्तिमानी मिङ्मा डेविड शेर्पाले गरे किलिमन्जारो हिमालको तेस्रो पटक आरोहण

विश्व कीर्तिमानी पर्वतारोही तथा माउन्टेन गाइड मिङ्मा डेविड शेर्पाले अफ्रिकाको सबैभन्दा अग्लो हिमाल किलिमन्जारोको तेस्रो पटक सफल आरोहण गरेका छन् । उनले पाँच हजार ८९५ मिटर उचाइमा रहेको किलिमन्जारोको चुचुरोमा आज अफिका समय अनुसार बिहान ७ बजे ३० मिनेटमा सफल आरोहण गरेका हुन् । उक्त हिमालको सफल आरोहणसँगै उनले सात महादेशका अग्ला शिखरहरु मध्ये पाचँ वटा हिमालहरु चढन सफल भएका छन् । सातै महादेशका अग्ला शिखरमा मध्ये सगरमाथा, आकानकागुवा, माउन्ट एल्ब्रस, डेनालीको सफल आरोहण गरिसकेका शेर्पाले बताए । सात महादेशका अग्ला शिखरहरु चुम्न अब दुईवटा मात्र बाँकी छ । बाँकी रहेका हिमालहरु अस्ट्रेलियामा रहेको कार्स्टेन्स पिरामिड र अन्टार्कटिकामा रहेको माउन्ट भिन्सन हुन् ।
उनले गत वर्षको सिजनमा केटु हिमाल पाँचौं पटक सफल आरोहण गरी आफ्नै कीर्तिमान तोडेर गिनिज वर्ल्ड रेकर्डमा नाम लेखाउन सफल भएका थिए । शेर्पा विश्वका आठ हजार मिटर अग्ला १४ वटै हिमाल आरोहण गर्ने कान्छो आरोही हुन् ।