अमेरिकाको न्यूयोर्कमा तीज महोत्सव २०२३ को भव्य तयारी

अमेरिकामा रहेका नेपालीहरुले धुमधामसंग हरितालिका तीज मनाउने भएकाछन् । सांस्कृतिक विविधता र सामुदायिक सम्लग्नतासहित त्रिवेणी इन्टरटेनमेन्ट एलएलसी न्यूयोर्कले नेपाली महिलाहरुको लागि हरितालिका तीजको भव्य आयोजना गर्न लागेको हो । अमेरिकाको मुख्य मुटु न्यूयोर्क सिटीमा नेपाली महिलाहरुको महत्वपूर्ण पर्व तीज मनाउने घोषणा गरीएको छ । नेपाली महिलाहरुको सांस्कृतिक पर्व तीजको आफ्नो छुट्टै बिषेशता छ । परम्परा साझा गर्न र एकता कायम गर्न तीज पर्वको महत्वपूर्ण भूमिका हुने गरेको छ । सामाजिक व्यक्तित्व नवराज केसी र खामलाल भट्टले यो तीजको चाजोपाजो मिलाउनु भएको हो । न्युयोर्क सिटीका मेयरका सल्लाहकार केसी र गोर्खा समाज अमेरिकाका अध्यक्ष खामले नेपाली महिलासहित अन्य देशका महिलाहरुलाई दर खुवाउने कार्यक्रम रहेको बताउनुभयो । केसीले तीज पर्व के हो ? यसको महत्वको बारेमा अमेरिकाको स्थानीय सरकारलाई जानकारी गराउने र परम्परा, संस्कृति र संस्कारबारे संरक्षण सम्बर्दन बारे अवगत गराउने बताउनुभयो । उहाँले एक अर्काको संस्कार, संस्कृति आदानप्रदानले एक अर्का समुदायप्रति बिश्वासको वातावरण बन्ने पनि बताउनुयभयो । तीज यहि भदौ ३१ गते अर्थात सेप्टेम्बर १७ मा आयोजना गरीने बताईएको छ ।