भदौ १६ बाट संखुवासभा आईडल हुदै, पहिलोले तीनलाख पाउने

संखुवासभामा संखुवासभा आईडल सञ्चालन हुने भएको छ । अरुण भ्याली ईभेन्ट मेनेजमेन्ट प्रालीले संखुवासभा आईडलको तेश्रो संस्करण ल्याउने भएको हो । प्रतियोगिता खुल्ला रहने आयोजकले जनाएको छ । भदौको १६ गतेबाट अडिसन सुरु हुने आयोजक अरुण भ्याली ईभेन्ट मेनेजमेन्ट प्रालीका अध्यक्ष देबेन्द्र घिमिरेले जानकारी दिए । संखुवासभाका ९ भोजपुरका २ र ईटहरी, गाईघाट र विर्तामोड गरि १४ स्थानबाट अडिसनलिईने अध्यक्ष घिमिरेले जानकारी दिए ।
प्रतियोगिताको पहिलो चरणमा उत्कृष्ठ १ सय प्रतिष्पर्धीहरु छनौट गरिने प्रतियोगिताको संयोजक बीरबहादुर लिम्बुले जानकारी दिए । त्यस पश्चात उत्कृष्ठ ५०, ३०, २०, १५, १२, ५ र ३ जनाको दरले छनौट हुँदै आउने लिम्बुको भनाई छ । उत्कृष्ठ ३ बाट विजेता घोषणा गरिनेछ । उत्कृष्ठ २० बाट भोटिङ राउण्ड सुरु हुने लिम्बुले बताए । यस पटक निर्णायक र भोटिङको ५०÷५० प्रतिशत अंकभार रहने बताईएको छ ।
प्रतियोगिताका विजेताले उपाधीसँगै नगद ३ लाख रुपैयाँ, एक गीत रेकर्डको अवसर, पाँच दिने भारत भ्रमणको अवसर प्राप्त गर्ने छन् । उपविजेता दुई जनाले नगद ५०÷५० हजार, एउटा गीत रेकर्डको अवसर, पाँच दिने भारत भ्रमण र टोकन अफ लव प्राप्त गर्नेछन् । त्यस बाहेकका उत्कृष्ठ पाँच भित्र परेका (विजेता र उपविजेता बाहेकका २ जना) ले पनि एक एक वटा गीत रेकर्डको अवसर, पाँच दिने भारत भ्रमण र टोकन अफ लभ प्राप्त गर्नेछन् ।
प्रतियोगितामा सहभागी हुन चाहनेहरुले भौतिक उपस्थितिमा फारम भर्नु पर्नेछ । फारम शुल्क एक हजार रुपैयाँ तोकिएको आयोजकले जनाएको छ । प्रतियोगिता मंसिर १५ र १६ गते सम्पन्न गर्ने योजना रहेको बताईएको छ । कार्यक्रमको माध्ययमबाट नयाँ प्रतिभाहरुको खोजी मात्र नभएर आन्तरिक पर्यटकहरु समेत संखुवासभा भित्र्याउने उद्देश्य सहित कार्यक्रमको आयोजना गर्न लागिएको आयोजकले जनाएको छ ।