बाँदरले मकै सखाप पार्दा किसान चिन्तित

दैलेखको भैरवी गाउँपालिकाका कृष्णप्रसाद जैसी बँदेल धपाउन बारीमै बस्ने गर्छन । घोगा लाग्ने बेलाको मकै बाँदरले नष्ट गर्न थालेपछि उनीमात्र नभई गाउँका कृषक मकै बारीमै दिनरात बिताउन थालेकाछन् ।
केही वर्षअघिदेखि बाँदर र बदेलले लगाएको बाली नष्ट गर्न थालेपछि कृषकहरु मारमा पर्दै आएका छन् । जंगल क्षेत्रको विस्तारसँगै नजिक आउने जङ्गली जनावरले वर्षमा छ महिना खान पुग्ने मकैखेती सखाप पारेपछि अन्न खोज्नुपर्ने चिन्तामा किसान छन् ।
जङ्गली जनावरले मकै सखाप पार्दै आएपछि जोगाउन बारीमै रातभर जागराम बस्नुपर्ने बाध्यतामा रहेका र वर्षमा छ महिना खान पुग्ने खेती बाँदर र बँदेलले नष्ट गरेपछि अन्न बेसाउनुपर्ने कृषकहरुको भनाई छ ।
भैरवी गाउँपालिकामा मात्र नभई बाँदरले जिल्लाका धेरै ठाउँमा मकैखेती नष्ट गर्दै आएको छ । कृषि विकास कार्यालय दैलेखले यहाँका सबै स्थानीय तहमा बाँदरले कृषकको मकैखेती मात्र नभई अन्य खेतीमा समेत क्षति पुर्याउँदै आएको जनाएको छ ।
कार्यालय प्रमुख दशरथ पाण्डेले २१ हजार एक सय ७५ हेक्टरमा किसानले मकैखेती लगाउँदै आएको जानकारी दिए । उनले पछिल्ला वर्षमा जङ्गली जनावरले किसानको बालीमा धेरै क्षति पु¥याउने गरेको बताए ।
उनले किसानको क्षतिमा कार्यालयले पर्याप्त मात्रामा राहत उपलब्ध गराउन नसक्ने बताए । अहिले मकैखेतीको समय भएकाले बाँदरले मकैखेतीमा क्षति पुर्याउँदै आएको हो । यसलाई नियन्त्रण गर्न किसानसँगै सम्बन्धित निकाय लाग्नुपर्ने उन्को भनाई छ ।
उनले किसानको कति मकैखेतीमा जङ्गली जनावरले क्षति पुर्यायो भन्ने विवरण कृषि विकास कार्यालयसँग नरहेको बताए । कार्यालयसँग क्षतिको विवरण छैन, स्थानीय सरकारले संकलन गरेको भन्ने छ, हामीले क्षतिको विवरण हेरेर बीउसम्म उपलब्ध गराउन सक्छौँ, कृषिले राहतभन्दा पनि अनुदान दिने गर्ने उन्को भनाई थियो ।
भैरवी गाउँपालिकाका कृषि शाखा प्रमुख प्रकाश भट्टराईले एक वडामा पाँचदेखि सात रोपनी जग्गामा किसानले लगाएको मकैमा बँदेलले क्षति पुर्याएको जानकारी दिए । उनले गाउँपालिकाका सबै वडाबाट जङ्गली जनावरले मकैमा पुर्याएको क्षतिको विवरण संकलन गर्ने कामलाई तीव्रता दिएको पनि बताए ।