सभापोखरीसम्म ट्रेकीङ रुट खोल्न संखुवासभाका सांसद खड्काको माग

संखुवासभाको सभापोखरीसम्म ट्रेकीङ रुट खोल्न माग गरीएको छ । संखुवासभाका सांसद दिपक खड्काले ट्रेकीङ एजेन्सी एशोसिएसन अफ नेपाल टानका अध्यक्ष निलहरी बाँस्तोलालाई ज्ञापन पत्र बुझाउँदै चाडो उक्त रुट खोल्न माग गर्नु भएको हो ।

सभापोखरी गाउँपालिकास्थित सभापोखरी धार्मिक तथा पर्यटकीय क्षेत्रको बृहत्तर गुरुयोजना निर्माण गरी आन्तरिक तथा बाह्य पर्यटक भित्र्याउनको लागि अबिलम्ब सभापोखरी सम्मको ट्रेकीङ रुट स्वीकृत गरीदिन नेपाल पर्यटन बोर्डलाईसमेत सिफारीस गरीएको छ ।

सभापोखरी गाउँपालिकाबाट प्राप्त सभापोखरीको महत्व र धार्मिकस्थलबारे तयार पारेको कागजपत्र टानका पूर्व बरिष्ठ उपाध्यक्ष नविन त्रितालले टानका अध्यक्ष बाँस्तोलालाई हस्तान्तरण गर्नुभयो ।

सांसद खड्काले जति सक्दो चाडो उक्त रुट खोल्नको लागि आग्रह गर्नुभएको हो । यो ट्रेकीङ रुट खोलिए आन्तरिक तथा बाह्य पर्यटक सभापोखरीको दर्शन गर्न र दृष्यावलोकन गर्न पुग्ने उहाँको भनाई थियो ।

यो सभापोखरी कोशी प्रदेशकै पर्यटकीय हव बन्ने सम्भावना भएकाले जति सक्दो खोल्नु पर्ने उहाँको भनाई थियो । अध्यक्ष बाँस्तोलाले संस्थागत रुपमा पहल गरीने र चाडै यो रुट खोल्न भूमिका खेल्ने बताउनुभएको थियो । कार्यक्रममा संखुवासभाका पर्यटनविदहरुको सहभागिता थियो ।