डेंगी संक्रमण बढ्‌याे

लामखुट्टेको टोकाइबाट हुने डेंगी संक्रमण देशभर बढ्न थालेकाे छ । सन् २०२३ को जनवरीयता नेपालमा डेंगी संक्रमितको संख्या ३ हजारनजिक पुगेको छ ।

इपिडिमियोलोजी तथा रोग नियन्त्रण महशाखाको तथ्यांकानुसार जनवरीयता जुलाई १५ सम्म संक्रमितको संख्या दुई हजार ९३० पुगेको छ । यो अवधिमा ६६ जिल्लामा डेंगी देखिएको छ। सुनसरीमा जिल्लामा मात्रै एक हजार ५ सय ७१ जना संक्रमित भएका छन्।

धादिङ, दार्चुला र कास्कीमा संक्रमितको संख्या १०० भन्दा माथि छ । काठमाडौं उपत्यकाका तीन जिल्लामा गरी १ सय ७ जना संक्रमित भएका छन् । पछिल्लो समय सबैभन्दा बढी संक्रमण सुनसरी, धादिङ, दार्चुलालगायत १० स्थानमा देखिएको छ ।

गत वर्षजस्तै डेंगीको अवस्था भयावह हुन नदिन आ–आफ्नो तहबाट रोकथामका कार्यक्रम सञ्चालन गर्न महाशाखाले अनुराेध गरेकाे छ। गत वर्ष साढे ५४ हजारमा संक्रमण देखिएको थियो भने ८८ जनाको निधन भएको थियो ।

डेंगीको संक्रमण देखिएपछि ज्वरो आउने, शरीर दुख्ने दादुराजस्ता फोका आउने, टाउको दुख्ने, पखाला लाग्ने जस्ता लक्षण देखिन्छन् । संक्रमणका कारण रगतमा प्लेटलेट्स कमी हुने भएकाले बिरामीले पोसिलो र झोलिलो पदार्थ बढी मात्रामा खानुपर्ने चिकित्सकको सुझाव छ ।