चितवनमा उत्पादित पशुआहार चीन निर्यात

भरतपुरमा रहेको होराइजन इन्टरनेसनल प्रालिले उत्पादन गरेको पशुआहार (हाइलेज) चीन निर्यात भएको छ । सन् २०२२ मा चिनियाँ उपराष्ट्रपति नेपाल आउँदा नेपालबाट चीनमा घाँस लैजाने विषयमा सम्झौता भएको थियो । सोहीअनुसार नेपालबाट चीनमा घाँस निर्यात भएको हो ।

भरतपुरमा रहेको होराइजन इन्टरनेसनल प्रालिले तयार गरेको १० कन्टेनर पशुआहार चीनको सिगात्से सहर पठाइएको हो । अब क्रमशः दैनिक २० कन्टेनर पशुआहार चीन पठाइने कम्पनीले जनाएको छ ।

कम्पनीका प्रमुख कार्यकारी निर्देशक चाङका अनुसार एक वर्षमा दुई सय करोड टन पशुआहार चीनको सिगात्से सहर पठाउने योजना छ । निकै चिसो हुने भएर घाँसको उत्पादन नहुने उक्त सहरमा पालिएका पशु चौपायाका लागि घाँस पठाउन लागिएको हो ।

डाँठ र दुधिलो घोगासहितको मकैको बोटबाट तयार पारिएको घाँससँगै अब क्रमशः अम्रिसो, नेपियरलगायतका घाँसबाट समेत पशुआहार बनाइँदै छ । यो कम्पनीले भरतपुर र वरपरका किसानबाट मकैको बोट नै खरिद गरेर प्रशोधन गरी पशुआहार बनाएको हो ।

चाङका अनुसार किसानलाई उन्नत जातको बीउ, सिँचाइको व्यवस्था र प्राविधिक सहयोगसमेत गरिँदै आएको छ । केरुङ र रसुवा नाकाबाट पहिलो चरणमा घाँस पठाइँदै छ । चीनको उक्त शहर क्षेत्रमा दैनिक पाँच सय कन्टेनर घाँसको माग रहेको छ ।