वर्षा र हावाहुरीले मकै बालीमा क्षति पुर्‍याएपछि किसान चिन्तित

बैतडीको दोगडाकेदार गाउँपालिका वडा नम्बर ८, पितरकाँडाका नरेन्द्र बिष्टले करीब ३ रोपनी जग्गामा मकैबाली लगाएका छन् । अहिले बारीमा मकै पसाउने बेला भएको छ ।

तर शनिबार राति परेको वर्षा र हावाहुरीले उनको मकैबालीमा क्षति पुगेको छ । बिष्टको २ रोपनी खेतमा लगाएको मकैबाली हावाहुरीले नष्ट भएको हो ।

बैतडीका अधिकांश ठाउँहरूमा मकै बालीमा क्षति पुर्‍याएपछि यहाँका स्थानीय किसानहरू चिन्तित बनेका छन् । घोगा लाग्ने बेलामा मकै बोट हावाहुरीले ढलेपछि भुरी बिष्ट पनि चिन्तित बनेकी छिन् ।

बिष्टका अनुसार वर्षा नहुँदासम्म रोगकीराले मकैबालीमा क्षति पुर्‍याएको थियो । जब वर्षा भयो वर्षापछि मकै ढलेर झन् क्षति पुर्‍याएको उनले बताए । हावाहुरी र वर्षाको प्रभावका साथै खेतमा जंगली जनावरहरूले पनि क्षति पुर्‍याउँदै आएका छन् । बँदेल, सुंगुर, दुम्सी, स्याल र बाँदरहरूले गर्दा प्रत्येक वर्ष मकैबालीमा क्षति हुने गरेको बिष्टले बताए ।

कृषि ज्ञान केन्द्र बैतडीका अनुसार जिल्लामा १४ हजार ५ सय हेक्टर क्षेत्रफल जमिनमा मकै खेती गरिँदै आएको छ ।