Trending
Monday, November 17, 2025
आइतबार साँझ आएको हावाहुरीका कारण धनुषाको आँपबालीमा ठूलो क्षति भएको छ । हावाहुरीका कारण रुखबाट आँप झरेपछि क्षति भएको किसानको भनाइ छ । कृषि ज्ञान केन्द्र धनुषाका प्रमुख शङ्करप्रसाद साहले गए राति आएको हावाहुरीले जिल्लाको सबैजसो स्थानको आँपबालीमा क्षति पुगेको बताए ।
क्षति विवरण सङ्कलन कार्य भइरहेको र फलेको करिब २५ प्रतिशत आँप नष्ट भएको उहाँले जानकारी दिए । हावाहुरीले कतै फल मात्रै झरेको छ भने कतै हाँगा समेत भाँचिएको उनले बताए ।
पाक्ने बेलामा हावाहुरीले आँपमा ठूलो क्षति गरेको भन्दै कृषकहरू चिन्तित बनेका छन् । आँप क्षतिबाट वर्षभरिलाई पुग्ने आय चौपट भएको मिथिला नगरपालिका –३, विश्रामपुरका किसान रामलखन महतोले बताउनुभयो । उनले आँपलगायत लिची र मकैबालीमा समेत हावाहुरीले असर पुगेको जानकारी दिए ।
यसैगरी, जिल्ला प्रहरी कार्यालय धनुषाका प्रवक्ता तथा प्रहरी निरीक्षक वेदप्रसाद गौतमले हावाहुरीले आँपबालीलगायत खरले छाएको घर तथा जस्तापाताको घरमा सामान्य क्षति पुगेको भए पनि मानवीय क्षति भने नभएको उनको भनाइ छ ।
