सगरमाथा शिखरसम्मको बाटो खुलेसँगै आरोहण सहज

यस वर्षको वसन्त ऋतुमा सगरमाथा आरोहणका लागि शिखरसम्मको बाटो खुलेको छ । शिखरसम्मको बाटो बनाउँदै आइसफल डाक्टरहरुको टोली सगरमाथाको शिखरमा पुगेको पर्यटन विभागका सगरमाथा आधार शिविर प्रतिनिधि खिमलाल गौतमले जानकारी दिएका छन ।

यस वर्ष दोस्रो शिविरभन्दा माथि शिखरसम्मको बाटो बनाउने जिम्मा लिएको इमाजिन नेपालको टोली शिखरमा पुगेको हो । बाटो बनाउने टोलीमा नौ जना आरोहीहरु सहभागी छन।

इमाजिन नेपालका प्रबन्ध निर्देशक  आरोही मिङ्मा शेर्पाको संयोजनमा भएको बाटो बनाउने काममा टोली प्रमुख दावा ग्याल्जे शेर्पासहित ङिमा नुरू शेर्पा, लाक्पा शेर्पा, दिपेन गुरुङ, पासाङ ङिमा शेर्पा, लाक्पा तेन्जिङ शेर्पा, फुर गेल्जेन शेर्पा, दा जाङ्बु शेर्पा र सुमन गुरुङ रहेका छन ।

शिखरसम्मको बाटो खुलेसँगै यस वर्षको लागि सगरमाथा आरोहण खुला गरेको पनि गौतमले जानकारी दिनुभयो । यस वर्ष सगरमाथा आरोहणको लागि नेपालसहित ६५ वटा देशका ४ सय ६७ जनाले अनुमति लिएको पर्यटन विभागले जनाएको छ । जसमध्ये ९८ जना महिला रहेका छन् ।