कुन हदसम्म नेताहरू भ्रष्ट रहेछन् भन्ने देखियो : माधव नेपाल

सत्तारुढ नेकपा (एकीकृत समाजवादी) का अध्यक्ष तथा पूर्व प्रधानमन्त्री माधवकुमार नेपालले नक्कली भुटानी शरणार्थी प्रकरणमा जोडिएकाहरूलाई कारबाहीको दायरामा ल्याउन सरकारसँग माग गरेका छन् ।

काठमाडौमा आज (बुधबार) आयोजित निर्मल लामा स्मृति प्रतिष्ठानको कार्यक्रममा अध्यक्ष नेपालले अहिले भ्रष्टाचारका फाइलहरू खोलिन थालेको भन्दै नेताहरू कति मात्रामा भ्रष्ट भएका रहेछन् भन्ने कुरा देखिएको बताए । उनले देशको राजनीति कुन तहसम्म गिरेको रहेछ भन्ने कुरा भ्रष्टाचारका काण्डहरूले दिइरहेको बताएका छन् । भ्रष्टहरूलाई कारबाही गर्न खुट्टा नकमाउन पनि उपप्रधान एवम् गृहमन्त्री नारायणकाजी श्रेष्ठलाई उनले आग्रह गरेका छन् ।

उनले भने, ‘एकपछि अर्को भ्रष्टाचार काण्डहरूका फाइल खुल्न थालेका छन्, यसले नेताहरू कति मात्रामा भ्रष्ट भएका रहेछन् भन्ने देखाउँछ । हाम्रो देशको राजनीति कुन तहसम्म गिरिसकेको रहेछ ? मानव तस्करी गर्ने काममा नेताहरूले नै अगुवाइ गर्ने गरेका छन् ।

उपप्रधान एवम् गृहमन्त्रीको ध्यान आकर्षण गर्दछु– तपाईले खुट्टा कमाउनु हुँदैन, दृढताका साथ अघि बढ्नुस् । जुनसुकै व्यक्तिहरू जुनसुकै मुद्दामा मुछिएका छन् भने बाँकी नराख्नुस् । नेपालको प्रतिष्ठामा आँच आउने खतरा भएको छ ।’