जेठ लाग्न लाग्दा ताप्लेजुङको माता पाथिभरा क्षेत्रमा भारी हिमपात

ताप्लेजुङको हिमाली क्षेत्रमा हिमपात भएको छ । सोमबार र मङ्गलबार वर्षासँगै जिल्लाको उच्च हिमाली क्षेत्रमा भारी हिमपात भएको हो ।

ताप्लेजुङको माता पाथिभरा क्षेत्रमापनि भारी हिमपात भएको स्थानीयले बताएका छन् । जेठ लाग्न लाग्दा अत्याधिक हिमपात भएको यो पहिलो पटक हो एक स्थानीयले भने ।

फक्ताङ्लुङ गाउँपालिका–६ लेलेपको घुन्सा, फले, वडा नं ७ ओलाङ्चुङगोला, याङ्मालगायत जिल्लाको हिमाली बस्तीमा हिउँ परेको घुन्साका टासी छिरिङ शेर्पा र ओलाङ्चुङगोलाका तेन्जिङ वालुङले जानकारी दिनुभयो । यसैगरी तेह्रथुम, सङ्खुवासभासँगको सीमावर्ती क्षेत्र तथा मैवाखोला गाउँपालिकाको शिर तीनजुरे–मिल्के–जलजले (टीएमजे) क्षेत्रमा पनि हिमपात भएको छ ।

हिमपात र वर्षा भएपछि किसान खुशी भएका छन् । मकैलगायत खाद्यान्न बाली लगाउने समयमा हिमपात र वर्षा हुँदा किसानलाई राहत मिलेको छ ।