दैलेखका ७३ वडामा पुग्यो राष्ट्रिय प्रसारण लाइन

दैलेखमा ११ स्थानीय तहका ९० वडा मध्ये ७३ वडामा राष्ट्रिय प्रसारण लाइन जोडिएको छ । नेपाल विद्युत् प्राधिकरण वितरण केन्द्र दैलेख, ग्रामीण विद्युतीय कार्यक्रम र स्थानीय तहको समन्वयमा दैलेखका ११ स्थानीय तहका ७३ वडामा राष्ट्रिय प्रसारण लाइन बिस्तार भएको हो ।

नेपाल विद्युत् प्राधिकरण वितरण केन्द्र दैलेखका प्रमुख गौरव पाण्डेले दैलेखका ११ स्थानीय तहका ९० वडामै राष्ट्रिय प्रसारण लाइन बिस्तारको काम भइरहेको र ७३ वडामा विद्युत् प्रसारण लाइन जोडिएको बताए ।

उनले अघिल्लो आर्थिक वर्षको ४२ करोड लागतमा बिद्युत् विस्तारको काम ९० प्रतिशत सकिएको र यो आर्थिक वर्षमा ११ करोड ६२ लाखको काम भइरहेको जानकारी दिए ।

उनले ११ स्थानीय तह मध्ये चामुण्डाबिन्द्रासैनी नगरपालिका, ठाटिकाँध गाउँपालिका र आठबिस नगरपालिका बाहेक अन्य आठ स्थानीय तहका वडामा राष्ट्रिय प्रसारण लाइन जोडिएको भन्दै महावु गाउँपालिकाका तीन वडामा विद्युत् विस्तारका लागि लाइन तानेर चार्ज गरिएको र छिटै बत्ती बाल्ने बताए ।

उनका अनुसार चामुण्डाबिन्द्रासैनी नगरपालिका, ठाटिकाँध गाउँपालिका र आठबिस नगरपालिकामा विद्युत् बिस्तारका लागि नेपाल विद्युत् प्राधिकरण कर्णाली प्रादेशिक कार्यालय र ऊर्जा विकास कार्यालय बाट ३२ करोडको काम भइरहेको छ ।

वितरण केन्द्र दैलेखका प्रमुख पाण्डेले ११ स्थानीय तह मध्ये, गुराँस, भगवतीमाई, डुगेश्वर, भैरवी र नौमुले गाउँपालिका तथा नारायण र दुल्लु नगरपालिकामा विद्युत् विस्तार भएको र महावुको तीन वडामा विद्युत् पुगेसँगै आठ वटा स्थानीय तहमा विद्युत् विस्तार हुने बताए ।