मेन्छियाम हाइड्रोपावरको आईपीओ आज भयो बाँडफाँट

मेन्छियाम हाइड्रोपावर लिमिटेडको धितोपत्रको सार्वजनिक निष्कासन (आईपीओ) बाँडफाँट भएको छ । कम्पनीले सर्वसाधारणका लागि ४ वैशाखदेखि ७ वैशाखसम्म निष्कासन गरेको आईपीओ आज बाँडफाँट गरेको हो ।

कम्पनीले सर्वसाधारणका लागि कुल ९ लाख ३४ हजार ९ सय १५ कित्ता साधारण सेयर (आईपीओ) निष्कासन गरेको थियो। आईपीओमा कुल १२ लाख ४४ हजार ३ सय ५ आवेदकले १ करोड ३७ लाख २० हजार ३० कित्ता सेयरका लागि आवेदन दिएका थिए । जसमध्ये ६५ हजार ६ सय ४६ वटाआवेदन रद्द भएर ११ लाख ७४ हजार २ सय २ आवेदन स्वीकृत भएको कम्पनीको धितोपत्र निष्कासन तथा बिक्री प्रबन्धक एनआईसी एशिया क्यापिटलले जनाएको छ ।

कम्पनीको आईपीओमा माग भन्दा बढी आवेदन परेकोले धितोपत्र निष्कासन तथा बाँडफाँट निर्देशिका अनुसार गोलाप्रथाबाट आईपीओ बाँडाफाँट भएको कम्पनीले जनाएको छ । स्वीकृत आवेदनमध्ये गोलाप्रथाबाट ९५ हजार ४ सय ११ जनाले १० कित्ताका दरले सेयर बाँडफाँट भएको एनआईसी एशिया क्यापिटलले जनाएको छ । जसमध्ये ४ जनाले थप एक कित्ता अर्थात कुल ११ कित्ताका दरले कम्पनीको सेयर प्राप्त गरेका छन् । अन्य आवेदकले भने कम्पनीको सेयर प्राप्त गर्न सकेनन् ।

कम्पनीले संखुवासभामा ४.७२ मेगावाटको माथिल्लो पिलुवा खोला २ जलविद्युत आयोजना निमार्ण गरिरहेको प्रमुख कार्यकारी अधिकृत रामेन्द्र रायमाझीले बताउनुभयो । कुल अनुमानित लागत १ अर्ब ३१ करोड ९० लाख ७० हजार ४ सय ८ रुपैयाँ रहेको छ भने प्रतिमेगावाट कुल अनुमानित लागत २७ करोड ९४ लाख ६४ हजार ६९ रुपैयाँ रहेको छ।