आरोहणका लागि जुगल हिमाल खोल्ने तयारी

सरकारले काठमाडौंबाट नजिक पर्ने जुगल हिमाल श्रृंखलाका पाँच वटा नयाँ हिमाल आरोहणका लागि खुला गर्ने भएको छ ।

संस्कृति, पर्यटन तथा नागरिक उडड्यन मन्त्रालयको प्रस्तावमा ती हिमाल आरोहणका लागि खुला गर्न लागिएको हो । हिमाल खुला गर्न मन्त्रालयले प्रस्ताव मन्त्रिपरिषद्मा लगिसकेको छ । पर्यटन विभागकाअनुसार जुगल हिमाली श्रृखलाका पाँचवटा हिमाललाई जुगल–१, जुगल–२, जुगल–३, जुगल–४ र जुगल–५ नामाकरण गरिएको छ । सिन्धुपाञ्चोकमा पर्ने जुगल हिमाल काठमाडौंबाट नजिकमा पर्ने हिमाल हो ।

२०७५ मा जुगल हिमालको पहिलोपटक सफल आरोहण भएको थियो । ६ हजार १ सय ५१ मिटर उचाइको ग्याल्जेन चुचुरोको प्रथम पटक सफल आरोहण भएको हो । ग्याल्जेन पिकसहित जुगल श्रृंखलामा ११ वटा चुचुरो पर्दछन् । उक्त हिमालको समावेशी सगरमाथा आरोही माया गुरुङ, शर्मिला थापा र मिलन लामाले मंगलबार आरोहण गरेका थिए ।

यो हिमश्रृङ्खलामा हालसम्म पहिचान भएका ११ चुचुरामध्ये ६ हजार २५६ मिटरदेखि ६ हजार ९६६ मिटर उचाइका आठ चुचुरा छन् । २०७० कात्तिकमा नेपाल पर्वतरोहण संघले खुला गर्न सकिने हिमालको संख्या मन्त्रालयमा बुझाएको थियो । उक्त सूची अनुसार नेपालमा १ हजार ७ सय ९२ वटा हिमाल आरोहणका लागि खुला गर्न सकिन्छ ।

अहिलेसम्म ४ सय ३ वटा हिमाल खुला गरिएको छ । आरोहणका लागि खुला गर्न बाँकी १ हजार ३ सय ८९ हिमाल रहेको बताइएको छ ।