थाती रहेका विधेयकहरु प्राथमिकताका आधारमा सदनमा प्रस्तुत गर्ने सहमति

सरकारले प्राथमिकतामा रहेका विभिन्न विधेयकहरुलाई संसदमा प्रस्तुत गर्न गृहकार्य थालेको छ । सोमबार प्रधानमन्त्री निवास बालुवाटारमा प्रधानमन्त्री पुष्पकमल दाहाल प्रचण्डले संसदमा प्रस्तुत गर्ने विधेयकका सम्बन्धमा विभिन्न दलका सचेतकहरुसँग छलफल गर्नुभएको हो ।

छलफलका क्रममा जनसरोकारसँग जोडिएका विभिन्न विधेयकहरुलाई प्राथमिकताका आधारमा सदनमा प्रस्तुत गर्ने सहमति जुटेको छ । राष्ट्रिय स्वतन्त्र पार्टीका प्रमुख सचेतक सन्तोष परियारले प्रतिनिधिसभा नियमावलीलाई १५ दिनभित्र टुङ्गो लगाउने र यसअघि थाती रहेका विधेयकहरुलाई प्राथमिकता आधारमा अघि बढाउने सहमति भएको जानकारी दिनुभयो ।

संसद सुरु भएपछि प्राविधिक कार्यमा व्यस्त रहेकाले अव संसदलाई बिजनेश दिने विषयमा छलफल केन्द्रित भएको उहाँले बताउनुभयो।

त्यस्तै माओवादी केन्द्रका प्रमुख सचेतक हितराज पाण्डेले संसदलाई व्यवस्थित गराउने र विधेकहरुलाई जनमुखी बनाउने तथा जनताका आवश्यकतासँग जोड्ने गरि विधेयकलाई अघि बढाउने विषयमा सवै दलहरुसँग छलफल गरिएको जानकारी दिनुभयो ।

सरकारले विकास, सुशासन, संक्रमणकालिन न्याय, शिक्षा, स्वास्थ्य, नागरिकतालगायतका विषयमा तयार भएका विधेयकहरु सदनमा लैजाने तयारी गरेको छ ।