सत्ता साझेदार दलभित्रको खटपटले प्रधानमन्त्रीलाई राष्ट्रपति निर्वाचनसम्म पनि थेग्न गाह्रो छः अध्यक्ष नेपाल

नेकपा एकीकृत समाजवादीका अध्यक्ष माधवकुमार नेपालले वर्तमान सत्ता साझेदार दलहरुबीच खटपट सुरु भइसकेको बताउनु भएको छ ।

शनिबार पार्टीको केन्द्रीय कमिटीको पाँचौं बैठकको उद्घाटन गर्दै अध्यक्ष नेपालले गठबन्धनले प्रधानमन्त्री पुष्पकमल दाहाललाई राष्ट्रपति निर्वाचनसम्म पनि थेग्न सक्ने अवस्था नरहेको बताउनु भएको हो ।

उहाँले सरकारमा संविधानको विरोध गर्ने र राजतन्त्रको वकालत गर्नेहरु रहेकाले त्यो राम्रो संकेत नभएको बताउनुभयो । उहाँले भन्नुभयो, ‘प्रधानमन्त्रीलाई कहिलेसम्म थेग्ने हो थाहा छैन । राष्ट्रपतिको चुनावसम्म थेग्ने होला । तर त्यो भन्दा पहिले नै हामीले देखिरहेका छौं–खटपट सुरु भइसकेको छ । यसै भन्न सकिने अवस्था छैन । हाम्रो ध्यान अरु कुरामा होइन । देश सही दिशामा अघि बढछ कि बढदैन भन्नेमा छ।’

उहाँले रवि लामिछानेको नागरिकता प्रकरणपछि राष्ट्रिय स्वतन्त्र पार्टीकाविरुद्ध जनताले बोल्न थालेका बताउनुभयो । उहाँले भन्नुभया ‘यो सरकारप्रति, अहिलेका मन्त्रीहरुप्रति मान्छे हिजो आशावादी थिए । अहिले निराश हुन थालेका छन् । भोट दिएर जिताउनेहरु नै उनीहरुको विरोधमा बोल्न थालेका छन् ।’