सडकमा तरकारी फालेर किसान आन्दोलन

उत्पादित तरकारी बिक्री नभएको भन्दै चितवनका किसानले नारायणगढका सडकमा तरकारी फालेका छन् । भारतीय तरकारीले नेपाली तरकारी बजार विस्थापित गरेको भन्दै किसानहरुले शुक्रबार विरोध स्वरुप नारायणगढका पुलचोकमा  तरकारी फालेका हुन् ।

समयमा मल बिउ नपाइने र उत्पादन तरकारी बिक्री नहुने जस्ता समस्याबारे सरकार मुगदर्शक भएको आरोप किसानहरुले लगाएका छन् । पश्चिम चितवनका किसान कृष्णराज पराजुलीले उत्पादित तरकारी बिक्री गर्न नसकेपछि बाध्य भएर सडकमा फाल्नु परेको गुनासो गर्नुभयो ।

“अहिले बजारमा भारतीय तरकारी छ्यापछ्याप्ती छ । नेपाली तरकारीले बजार पाएको छैन ।,” उहाँले गुनासो गर्नुभयो, “खेतमा तरकारी कुहिएर जान्छ तार, सडकमा आएपछि त सबैको आखा पर्छ नि ।”

पूर्वी चितवन खैरहानीका किसान पूर्ण महत्तोले उत्पादित तरकारीको लागत मूल्य समेत नउठेको गुनासो गर्नुभयो । “खाडीमा जाम भने उमेर छैन बारीमा जाम भने लागत उठ्दैन ।,” उहाँले भन्नुभयो, “विचौलियाका कारण तरकारी बिक्री गर्न गाह्रो भयो । सरकारले हाम्रो कुरा सुनोस् भन्ने माग छ ।”

अहिले बन्दा पाँच रुपियाँ, फुल काउलि १० रुपियाँ, गाजर पाँच रुपियाँमा पनि बिक्री गर्न गाह्रो भएको उहाँले बताउनुभयो ।