Trending
नवलपरासी (बर्दघाट सुस्तापूर्व) नवलपुर स्थित त्रिवेणी धाम र चितवनको वाल्मीकि आश्रम जोड्ने गरि नारायणी नदीमा झोलुङ्गे पुल निर्माण भएपछि पर्यटकको आगमनमा वृद्धि भएको छ ।
झोलुङ्गे पुल अवलोकन गर्नकै लागि यहाँ सयौँ पर्यटक दैनिक रुपमा आउने गरेका छन् । झोलुङ्गे पुल अवलोकन गर्न नेपाल र भारतबाट दैनिक पाँच सय हाराहारी पर्यटक आउने गरेको विनयी त्रिवेणी गाउँपालिका–६ का अध्यक्ष नुरेन्द्र शाहले बताउनुभयो ।
‘झोलुङ्गे पुल हेर्न दैनिक पाँच सय हाराहारी पर्यटक आउँछन् । फोटो खिच्छन् । टिकटक बनाउँछन् । यो पुल अहिले टिकटक भाइरल पुल भएको छ । ’ अध्यक्ष शाहले भन्नुभयो – धार्मिक कार्यमा त यहाँ पर्यटकको आगमन हुन्थ्यो नै पुल बनेपछि अहिले युवाहरू पनि आउँछन् । नयाँ नयाँ ठाउँबाट आउने पर्यटकहरू बढेका छन् । ’
पुल अवलोकन गर्न आउनेहरू नजिककै रहेको गजेन्द्र मोक्षधाम, लक्ष्मीनारायण मन्दिर, सिसमहल र आसपासका विभिन्न देवीदेवताका मठ मन्दिरको दर्शन समेत गरेर फर्कने गरेका छन् । जसले गर्दा व्यापार व्यवसायमा समेत टेवा पुगेको छ ।
पुल बनेकै कारण अहिले केही स्थानीयको दैनिकी चलाउन पनि सहज भएको छ । पुलको आडैमा साना साना छाप्रा बनाएर केही स्थानीयले व्यापार सुरु गरेका छन् । केही समय पहिलेबाट मात्रै यहाँ व्यापार सुरु गर्नुभएका हरि शङ्कर कँडेलका अनुसार शुक्रबार र शनिबार धेरै पर्यटक आउँछन् । बिदाको समयमा पनि बढी हुन्छन् । त्यस समयमा व्यापार राम्रो हुन्छ । अन्य समयमा पनि सन्तोषजनक नै व्यापार हुने गरेको उहाँ बताउनुहुन्छ । पुल बनेकै कारण घरखर्च चलाउने माध्यम पाएको उहाँको भनाई छ । उहाँ जस्तै आठ–दश परिवारले खाजानास्ताको व्यापारबाट घरखर्चको जोहो गरेका छन् ।
हिन्दु धर्मावलम्बीहरूको आस्थाको केन्द्रको रुपमा रहेको त्रिवेणी धाम र वाल्मीकि आश्रम जोड्ने गरी ९ वर्ष अघिदेखि नारायणी नदीमा झोलुङ्गे पुल निर्माणको पहल भएको भएपनि विभिन्न अवरोधका कारण पुरा हुन सकेको थिएन । पुल ६ महिना अघि मात्रै निर्माण सम्पन्न भएको हो । चितवन राष्ट्रिय निकुञ्ज क्षेत्रमा पर्ने भएकाले पुल निर्माणको प्रक्रिया शुरु गर्न नै लामो समय लागेको थियो ।