भक्ति थापाको जन्मस्थललाई पर्यटकीय गन्तव्य बनाइने

राष्ट्रिय विभूति भक्ति थापाको जन्मस्थल मर्स्याङ्दी गाउँपालिका वडा ३ ढगैंबेंसीलाई पर्यटकीय गन्तव्य बनाइने भएको छ । ऐतिहासिक स्थलको प्रवर्धन र विकासका लागि मर्स्याङ्दी गाउँपालिकाले पहल गरिरहेकोमा स्थानीयले पनि यसको संरक्षण र संवर्धन गर्न गाउँवासी एकमत भएका हुन् ।

नेपाल एकीकरणका प्रमुख पात्र भक्ति थापाको जन्मथलो ढगेंबेंसीमा पर्यटन प्रवर्धन गर्न उहाँकै सालिक निर्माण गरिएको छ । गाउँकै टुकमान थापाले दान दिएको २ रोपनी ६ आना जग्गामा थापाको अर्धकदको सालिक निर्माण गरिएको छ ।

वि.स. १८०२ मा जन्मिएका भक्ति थापाको जन्मस्थलको संरक्षण र संवर्द्धन हुन नसकिरहेको बेला भक्ति थापा जन्मस्थल संरक्षण तथा संवर्द्धन विकास समिति गठन गरेर यसको प्रचार प्रसार, संरक्षण र प्रवर्धन थालिएको हो ।

यसको संरक्षणका लागि २०६७ माघ ८ मा चेतबहादुर थापाको अध्यक्षतामा ११ सदस्यीय समिति गठन भएको थियो । सो समितिले भक्ति थापाले गाईबस्तु चराउने र गोठ राख्ने गरेको प्राकृतिक मनोरमस्थल हर्सिङडाँडामा धर्मशाला निर्माण गरेको मर्स्याङ्दी गाउँपालिका ३ का निवर्तमान वडाध्यक्ष एवम् तत्कालीन समितिका कोषाध्यक्ष प्रेमबहादुर बस्नेतले बताउनुभयो ।

भक्ति थापाको जन्मस्थल विकासका लागि ८ रोपनी जग्गा थप गर्ने, खुदीको बुद्धबजारबाट मोटरबाटो निर्माण र सडक स्तरोन्नति, पार्कसहितको पिकनिकस्थल निर्माण र सङ्ग्रहालय बनाउने तयारी छ ।