प्रधानमन्त्रीमा आलोपालो र राष्ट्रपतिबारे संस्थागत निर्णय हुनुपर्छ : गगन थापा

नेपाली कांग्रेस महामन्त्री गगन थापाले पार्टी सभापति एवं संसदीय दलका नेता शेरबहादुर देउवाले सरकार निर्माण र राष्ट्रपतिबारे बन्दकोठामा सहमति गरे त्यसलाई कांग्रेसले नबोक्ने बताउनुभएको छ ।

उहाँले प्रधानमन्त्री र राष्ट्रपतिका विषयमा पार्टीभित्र संस्थागत निर्णय हुनुपर्ने बताउनुभयो । नेकपा (माओवादी केन्द्र) सँग आलोपालो प्रधानमन्त्री र राष्ट्रपतिबारे भागबन्डाको तयारी भइरहेका बेला उहाँले बुधबार यस्ता विषयमा पार्टीले संस्थागत निर्णय गर्नुपर्ने बताउनुभयो ।

कांग्रेस संसदीय दलको नेतामा पराजित भएपछि थापाले प्रतिक्रिया दिँदै अब स्वाभाविक रूपमा कांग्रेसको नेतृत्वमा सरकार बन्नुपर्ने र त्यससम्बन्धी निर्णय पारदर्शी हुनुपर्ने धारणा राख्नुभयो ।

“सरकारको आलोपालो र राष्ट्रपतिको कुरा गर्दा भएका निर्णयमा यदि समझदारी हुन्छ र त्यो संस्थागत रूपमा भएको छ भने त्यसमा कांग्रेस बाँधिन्छ । तर बन्दकोठामा गरियो भने त्यस्तो निर्णय कांग्रेसले बोक्दैन । त्यसैले पछि धोका भयो भन्न पाइँदैन”, थापाले चेतावनी दिँदै भन्नुभयो ।

बुधबार सम्पन्न कांग्रेस संसदीय दलको नेतामा सभापति शेरबहादुर देउवा ६४ मत ल्याएर विजयी हुनुभएको थियो । प्रत्यासी थापाले २५ मत ल्याउनुभएको थियो ।