राष्ट्रिय सहमति बिना एमसीसी अगाडि बढाउन नसकिने माओवादी संसदीय दलको निर्णय

सत्ता साझेदार दल नेकपा माओवादी केन्द्रको बुधबार बसेको संसदीय दलको बैठकले अमेरिकी आर्थिक सहायता मिलिनियम च्यालेन्ज कर्पोरेशा (एमसीसी) सम्झौताका विषयमा राष्ट्रिय सहमति जुट्नुपर्ने निष्कर्श निकालेको छ ।

सत्ता गठबन्धनको नेतृत्व गर्दै आएको नेपाली काँग्रेसले एमसीसी संसदबाट पारित हुनुपर्नेमा जोड दिदै आए पनि यो यस विषयमा गठबन्धनभित्र छलफल र सहमति नजुटेका कारण संशोधन र परिमार्जन नगरी अगाडि बढाउन नसकिने माओवादी केन्द्रका सचेतक देव गुरुङले बताए ।

‘सहमति नजुटे त्यसको विपक्षमा मतदान गर्ने र संशोधन वा परिमार्जन नगरी अगाडि बढाउन सकिँदैन । संसद् सुचारु नगरी कुनै पनि एजेण्डा अगाडि बढ्दैन ।’ गुरुङले बताए ।

प्रधानमन्त्री एवम् काँग्रेस सभापति शेरबहादुर देउवाले बुधबार बस्न लागेको संसद्को बैठकमा एमसीसी टेबल हुने विश्वास व्यक्त गरेका थिए । तर गठबन्धनमा रहँदै आएको माओवादी केन्द्रले यस विषयमा राष्ट्रिय सहमति जुट्नुपर्ने निर्णय गरेको हो ।