प्रधानन्यायधीशले राजीनामा नदिए देशव्यापी आन्दोलन गर्नुपर्ने नेपाल बार एशोसियशनका सल्लाहकारको सुझाव

प्रधानन्यायधीश चोलेन्द्र शमशेर जबरासँग असन्तुष्ट न्यायधीशहरुको सम्बन्धमा मंगलबार बसेको नेपाल बार एशोसियशनको सल्लाहकार समितिले प्रधानन्याधीशको राजीनामा माग गर्नुपर्ने सुझाव प्रदान गरेको छ ।

वरिष्ठ अधिवक्ता टीकाराम भट्टराईका अनुसार सल्लाहकार समितिका ९९ दशमलव ५ प्रतिशतको प्रधानन्यायधीश जबराको राजीनामा माग्नुपर्ने अन्यथा देशव्यापीरुपमा आन्दोलन नै गर्नुपर्ने विषयमा मत केन्द्रित रहेको छ ।

यसैगरी वरिष्ठ अधिवक्ता शम्भु थापाले पनि सर्वोच्च अदालतको प्रतिवेदन कार्यान्वयन हुनुपर्ने बताए । अधिवक्ता हरिकृष्ण कार्कीको अध्यक्षतामा गठन गरिएको प्रतिवेदन कार्यान्वयन हुनुपर्ने बताउदै थापाले सडकमा नै उत्रनुपर्ने अवस्था समेत आउन सक्ने बताए ।

यसैगरी, वरिष्ठ अधिवक्र रमण श्रेष्ठले पनि प्रधानन्याधीशले तत्काल राजीनामा दिनुपर्ने बताए । उनले अहिले नै सडक आन्दोलनको कार्यक्रम भने तय नभएको तर राजीनामा नआए अर्को कार्यक्रम तय गर्नुपर्ने तर्क राख्नुभयो ।

एशोसियशनका वरिष्ठ अधिवक्ता, पूर्व पदाधिकारी र सल्लाहकारहरुसँग गरेको छलफलले यस्तो सुझाव निकालेको हो । यस विषयमा बारको कार्य समितिको बैठकले निर्णय गर्नेछ ।